Waziri wa Mambo ya Nje wa Uturuki, Hakan Fidan, amesema sera za kijeshi za Waziri Mkuu wa Israel Benjamin Netanyahu zimeifanya Israel kujikuta katika hali ya kutengwa kimataifa. Akizungumza Istanbul, Fidan alisisitiza kuwa kurejesha uhusiano na Israel si jambo linalowezekana tena, si kwa Uturuki pekee bali pia kwa mataifa mengi duniani.
Ameeleza kuwa viongozi wa Ulaya wanakwepa kuonekana hadharani na Netanyahu, wakihofia athari za kisiasa kwa wapiga kura wao. Fidan aliongeza kuwa hali hii ni ushahidi wa kuongezeka kwa upinzani wa kidiplomasia dhidi ya Israel, huku akitilia shaka uwezo wa Netanyahu kutembelea nchi yoyote nje ya Marekani.
Kwa mujibu wa Fidan, msimamo wa Uturuki ni sehemu ya mwitikio mpana wa jumuiya ya kimataifa, ambapo baadhi ya mataifa huchagua kueleza waziwazi upinzani wao, na mengine kujitenga kimya kimya bila tamko rasmi.
CHANZO: TRT Afrika
