Rikicin siyasa ya ƙara tsananta a Uganda bayan babban hafsan soji, Muhoozi Kainerugaba, ya bayyana cewa an kashe ’yan adawa 30 tare da kama fiye da mutane 2,000 a bayan sakamakon zaɓen shugaban ƙasa da aka gudanar a ranar 15 ga Janairu. Wannan mataki ya tayar da hankulan jama’a da ƙungiyoyin kare haƙƙin bil’adama a faɗin duniya.
A wani saƙo da ya wallafa a shafin X, Muhoozi — ɗan Shugaba Yoweri Museveni — ya ce dakarun tsaro sun kama “’yan daba” sama da 2,000 da ya zargi suna da alaƙa da jam’iyyar adawa ta National Unity Platform (NUP) karkashin jagorancin Bobi Wine. Ya kuma bayyana cewa an kashe mutane 30 daga cikin masu zanga-zanga, yana kiran su da “’yan ta’adda”.
Bobi Wine, wanda ya zo na biyu a zaɓen da kashi 25 cikin 100, ya zargi gwamnati da sace zaɓe, yana mai kiran nasarar Museveni da “sata a fili”. Ya kuma ɓoye kansa bayan ya ce jami’an tsaro sun kai farmaki gidansa.
Hukumar Zaɓe ta Uganda ta sanar da cewa Museveni mai shekaru 81 ya lashe zaɓen karo na bakwai da kashi 72 cikin 100. Gwamnatin ta ce nasarar ta nuna ƙarfin jam’iyyar National Resistance Movement (NRM).
Daga cikin wadanda aka kama akwai dan majalisa Muwanga Kivumbi daga yankin Butambala, inda aka fi samun rikicin ranar zaɓe. Kivumbi ya ce jami’an tsaro sun kashe wakilansa na kamfe 10, yayin da ’yan sanda suka ce an buɗe musu wuta ne bayan masu zanga-zangar sun yi yunƙurin kona cibiyar ƙirga ƙuri’u da ofishin ’yan sanda.
