Hukumar Tsaro ta Farar Hula (Department of State Services – DSS) ta gurfanar da tsohon Antoni Janar na Tarayya, Abubakar Malami, da ɗansa Abdulaziz Malami a gaban Babbar Kotun Tarayya da ke Abuja, kan tuhume-tuhume biyar da suka shafi tallafa wa ta’addanci da taimakawa aikata laifi.
An gurfanar da su ne a gaban Mai Shari’a Joyce Abdulmalik, inda dukkansu suka musanta laifukan da ake zarginsu da su. DSS ta ce tuhume-tuhumen sun haɗa da taimakawa da ƙarfafa ayyukan ta’addanci ta hanyar kuɗi, da kuma shirye-shiryen aikata ta’addanci.
Haka kuma, ana zargin Malami da ɗansa da mallakar makamai ba tare da lasisi ba, ciki har da bindigar Sturm Magnum 17-0101, harsasai 16 masu rai da kuma harsasai 27 da aka riga aka harba. DSS ta ce an kama kayan ne a hannunsu ba tare da izinin doka ba.
Shari’ar na daga cikin matakan da hukumomin tsaro ke ɗauka na ƙarfafa yaƙi da ta’addanci da hanyoyin tallafawa ayyukansa, yayin da kotu ta dage sauraron shari’ar zuwa wani lokaci na gaba.
