Tarayyar Turai (EU) ta sanar da tsawaita takunkumin hana sayar da makamai ga Zimbabwe na karin shekara guda, wanda zai ci gaba har zuwa 20 ga Fabrairu 2027. Wannan mataki ya biyo bayan nazarin shekara-shekara da Majalisar EU ke yi kan takunkuman da aka dade ana kakaba wa kasar.
Sai dai Majalisar ta bayyana cewa an cire duk sauran matakan takunkumi da suka shafi hana tafiye-tafiye da kuma daskarar da kadarori. Wannan ya zo ne bayan cire Zimbabwe Defence Industries daga jerin hukumomin da aka kakaba wa takunkumi a shekarar 2025, wadda ita ce hukuma ta karshe da ta rage cikin jerin.
EU ta jaddada cewa har yanzu tana da niyyar ci gaba da hulɗa da Zimbabwe ta hanyar da ta dace, tare da fatan karfafa dangantakar kasuwanci da zuba jari. Haka kuma ta ce za ta ci gaba da sa ido kan yadda matakan ke tasiri bisa la’akari da duk wani sauyi da zai iya tasowa a nan gaba.
An fara kakaba takunkuman ne tun shekarar 2002, sakamakon damuwa kan take hakkin bil’adama, rikicin siyasa, da tashe-tashen hankula, musamman a lokacin zaben shugaban kasa na wancan lokaci. Tun daga lokacin, ana ta sabuntawa da daidaita matakan bisa yanayin da kasar ke ciki.
Majiyar Labari: AA
