An samu ɗan lalacewar dukiya bayan wata drone ta faɗo kan wani gini mai tsawo a unguwar Dubai Creek Harbour, kusa da tsakiyar birnin Dubai a Hadaddiyar Daular Larabawa. Hukumomin Dubai sun bayyana cewa lamarin ya faru ne a wani yankin zama, amma ba a samu rahoton jikkata ko mutuwa ba.
A cikin wata sanarwa, ofishin yaɗa labarai na Dubai ya ce an gaggauta kwashe mazauna ginin domin tabbatar da tsaron su. Haka kuma jami’an kare fararen hula sun samu nasarar kashe wata ƙaramar gobara da ta tashi bayan faɗuwar drone ɗin.
Lamarin na zuwa ne a daidai lokacin da rikicin da ke gudana tsakanin Iran, Isra’ila da Amurka ke ci gaba da tayar da hankali a yankin. Iran ta mayar da martani kan hare-haren da Amurka da Isra’ila suka kai mata a ranar 28 ga Fabrairu, inda ta kai hare-hare kan wasu wurare a ƙasashen yankin da suka haɗa da Qatar, Hadaddiyar Daular Larabawa da Bahrain.
Rahotanni daga Iran sun ce hare-haren da Amurka da Isra’ila suka kai sun yi sanadin mutuwar sama da mutane 1,348 tare da jikkata fiye da 17,000, ciki har da manyan jami’an ƙasar da suka haɗa da tsohon Jagoran Addini Ayatollah Ali Khamenei.
