Wasu da ake zargin ‘yanta’addan Boko Haram da ISWAP ne sun kai hari da daddare kan wani sansanin sojojin Nijeriya a unguwar Ajilari Cross da ke Maiduguri, babban birnin jihar Borno. Harin ya faru ne da misalin ƙarfe 12 na dare, a wani lokaci da yankin ya dade yana cikin kwanciyar hankali bayan shekaru na rikici.
Jami’an tsaro sun yi gaggawar mayar da martani inda suka fatattaki maharan, lamarin da ya hana harin yin muni. Rahotanni daga jami’an agaji da mazauna yankin sun tabbatar da cewa ba a samu asarar rayukan fararen hula ba, sai dai an kashe wasu daga cikin maharan yayin artabu.
Mai magana da yawun ‘yansanda ya bayyana cewa an daƙile harin, tare da ƙarin wani yunkurin hari a Damboa da jami’an tsaro suka dakatar. Mazauna yankin sun ce sun ji ƙarar harbe-harbe cikin dare, kuma wasu sun tabbatar da ganin gawarwakin maharan huɗu bayan farmakin.
Wannan hari na zuwa ne a lokacin da ƙungiyoyin Boko Haram da ISWAP ke ƙara yawan kai hare-hare a arewa maso gabashin Nijeriya, duk da cewa Maiduguri ta samu sauƙin tsaro a ‘yan shekarun nan bayan mummunan rikicin da ya shafe sama da shekaru goma sha shida.
Majiyar Labari: TRT HAUSA
