Sojojin Operation HADIN KAI sun daƙile wani yunƙurin kai hari da ’yan ta’adda suka yi daga tsaunukan Mandara domin kutsawa cikin garin Bitta da ke Jihar Borno, inda suka hallaka da dama daga cikinsu tare da rage ƙarfin aikinsu sosai.
Da sanyin safiyar ranar Alhamis, sojojin, tare da tallafin na’urorin sa ido na zamani, sun gano motsin ’yan ta’addan da ke tunkarar yankin. Cikin tsari da ƙwarewa, sojojin suka ƙyale su su kusanto kafin buɗe wuta domin kare kansu. Artabun ya kai ga hallaka ’yan ta’adda da dama, ciki har da wani babban jagora da mai ɗaukar bidiyonsa. Yayin da sauran suka yi ƙoƙarin tserewa, sashen jiragen sama na OPHK ya kai hare-hare, wanda ya katse hanyoyin gudunsu tare da ƙara tarwatsa su.
Bayan artabun, sojojin sun gudanar da cikakken bincike a yankin, inda suka ƙwato makamai da kayan aiki da suka haɗa da bindigogin AK-47, PKT, bel-bel na harsasai, jigidar harsasai, wayoyin salula, camcorder, babura da kekuna. Haka kuma, an gano jinin ’yan ta’addan a ƙasa da kuma kaburbura marasa zurfi a cikin daji, abin da ke nuna ƙarin asarar rayuka da suka yi yayin artabun da hare-haren sama da suka biyo baya.
