Amurka na iya sassauta takunkumin da aka kakabawa man fetur na Iran da ke makale a cikin tankunan ruwa, a wani yunkuri na kara wadatar mai a duniya da kuma rage tashin farashi. Sakataren baitul malin kasar, Scott Bessent, ya bayyana cewa akwai kusan ganga miliyan 140 na mai da za a iya sakin su cikin kasuwa nan ba da jimawa ba.
A cewarsa, wannan adadin zai iya wadatar da kasuwa na tsawon kwanaki 10 zuwa makonni biyu, gwargwadon yadda ake lissafi. Ya ce Amurka na duba amfani da wannan damar domin daidaita farashin mai yayin da ake ci gaba da rikicin yankin.
Wannan mataki na zuwa ne a daidai lokacin da rikici tsakanin Iran da hadin gwiwar Amurka da Isra’ila ya tsananta tun daga karshen watan Fabrairu. Iran ta mayar da martani ta hanyar hare-haren makamai masu linzami da jiragen yaki marasa matuki, tare da rufe mashigar Hormuz, wacce ke da matukar muhimmanci ga jigilar mai a duniya.
Rufe wannan mashiga ya janyo tangarda ga kasuwannin makamashi na duniya, lamarin da ya sa Amurka ke neman hanyoyin rage tasirin hakan, ciki har da yiwuwar sakin man Iran domin daidaita kasuwa na dan lokaci.
