Kamfanonin jigilar kaya da ke aiki kusa da mashigar Hormuz sun fara fuskantar sakonnin zamba da ke alkawarin wucewa cikin sauki idan aka biya da kudin crypto. Kamfanin kula da hadari na Girka, MARISKS, ya bayyana cewa wadannan sakonni na yaudara ne kuma suna amfani da yanayin rikicin yankin wajen damfarar masu jiragen ruwa.
Wannan na faruwa ne a lokacin da rikici ke ci gaba a yankin Gulf, inda daruruwan jiragen ruwa da dubban ma’aikatan ruwa suka makale sakamakon takunkumin da Amurka da Iran ke sanyawa lokaci-lokaci. Mashigar Hormuz na daya daga cikin muhimman hanyoyin jigilar mai da iskar gas a duniya.
A cewar MARISKS, wasu da ba a san ko su waye ba na ikirarin cewa su jami’an Iran ne, suna aika sakonni ga masu jiragen ruwa suna neman a biya kudin wucewa ta hanyar Bitcoin ko Tether. Kamfanin ya gargadi cewa wannan ba gaskiya ba ne kuma ba shi da alaka da hukumomin Iran na gaskiya.
Halin ya kara rikicewa sakamakon tattaunawar tsagaita wuta da kuma shirin Iran na sanya harajin wucewa ga jiragen ruwa. A lokaci guda, rahotanni sun nuna cewa wasu jiragen da suka yi kokarin wucewa sun fuskanci gargadin harbi, wanda ya tilasta musu komawa baya.
Majiyar Labari: TRT AFRIKA
