Jagoran Addini na Iran, Mojtaba Khamenei, ya bayyana cewa daga ƙarshe Amurka za ta tsinci kanta a yanayin da zai tilasta mata barin yankin Gabas ta Tsakiya bayan ta fuskanci abin da ya kira “mummunan bugu mai zafi.”
Khamenei ya yi waɗannan kalamai ne a ranar Litinin a wata sanarwa da gidan talbijin na gwamnatin Iran ya watsa.
“A yau, bayan sun sha mummunan bugu daga hannun jaruman mayaƙa da masu tsaron Mashigar Hormuz, su (maƙiyan) ba sa gangancin ƙetarawa ta Tekun Larabawa,” in ji Khamenei.
“Duk lokacin da suka yi gangancin fuskantar wannan wurin, suna jawo wa kansu illa ne kawai. Kuma ba za a ɗauki lokaci mai tsawo ba kafin Tekun Larabawa ya shafe su daga kasancewa a cikinsa,” in ji Khamenei.
Waɗannan kalamai na zuwa ne a daidai lokacin da ake ci gaba da ƙoƙarin farfaɗo da tattaunawa domin kawo ƙarshen rikicin da ke tsakanin Iran da Amurka.
Tekun Larabawa wata muhimmiyar hanyar ruwa ce da ta taso daga tsibirin Larabawa (Arabian Peninsula) zuwa ƙasar Indiya, kana ta samar da hanya wadda ta isa ga gaɓar tekun Iran da kuma Mashigar Hormuz.
Iran da Amurka suna ta gwabza yaƙi wajen neman ikon sarrafa wannan muhimmiyar hanyar ruwa tun bayan ɓarkewar yaƙin da ya fara da hare-haren da Amurka da Isra’ila suka kai wa Iran a watan Fabrairu.
Kafin ɓarkewar rikicin, Mashigar Hormuz tana ɗaukar kusan kashi ɗaya cikin biyar na albarkatun man fetur da iskar gas da ake samarwa a duniya.
Tehran ta ƙaƙaba takunkumin hana shiga da fita a mashigar bayan soma yaƙin, matakin da ya sa Washington ta mayar da martani ta hanyar ƙaƙaba takunkumin hana shiga da fita a tashoshin jiragen ruwa na Iran.
