Shirika la Ndege la Air Tanzania limetangaza kurejesha safari za ndege kati ya Dar es Salaam na Moscow, Urusi, kuanzia Septemba 7, saa chache baada ya kusitisha kwa muda safari hizo kutokana na tathmini ya usalama wa mazingira ya uendeshaji wa ndege katika njia hiyo.
Air Tanzania ilitangaza Ijumaa kuwa safari hizo zitaendelea tena Septemba 7, baada ya awali kutangaza kusitishwa kwake kuanzia Septemba 4.
Moscow imekuwa ikikabiliwa na usumbufu mkubwa katika shughuli za usafiri wa anga katika siku za hivi karibuni, huku viwanja vya ndege vya jiji hilo vikifungwa mara kwa mara kutokana na mashambulizi ya ndege zisizo na rubani, kwa mujibu wa takwimu za Flightradar24.
Hali hiyo imeibua pia tahadhari kutoka kwa kiongozi wa Ukraine. Jumanne, Rais wa Ukraine, Volodymyr Zelenskiy, alizionya kampuni za ndege pamoja na kampuni za bima kwamba anga ya Urusi inazidi kuwa “hatari.”
Zelenskiy alisema Ukraine haitoi tishio kwa usafiri wa anga wa kiraia, lakini akaonya kuwa uwepo wa droni katika anga ya Urusi unapaswa kuzingatiwa na kampuni zinazohusika na usafiri wa anga na bima.
Kwa upande wake, Rais wa Urusi, Vladimir Putin, alilitaja suala hilo kuwa ni “ugaidi wa kiserikali” na kusema linaweza kufanya iwe vigumu zaidi kurejesha mazungumzo ya amani kati ya Urusi na Ukraine.
Air Tanzania haikutoa maelezo zaidi kuhusu sababu mahsusi zilizopelekea kurejesha safari hizo baada ya kusitishwa kwa muda.
