An kaddamar da wani kamfen rigakafin mpox a tsibirin La Réunion domin dakile yaduwar cutar a yankin Tekun Indiya, musamman bayan rahotannin karuwarta a Madagascar. Kafafen yada labaran Faransa sun ce an dauki matakin ne bayan tabbatar da kamuwa da cutar a wurare makwabta tun daga Disambar 2025.
A La Réunion, an tabbatar da mutum daya dauke da mpox a ranar 22 ga Janairu—mutumin ya dawo ne daga Madagascar. Tun daga wannan lokaci, hukumomi sun ce ba a sake samun wani sabon kamuwa da cutar ba, amma sun dauki matakan kariya don hana shigowa da yaduwar cutar.
Hukumar Lafiya ta Yanki, Agence régionale de santé (ARS), ta bayyana cewa rigakafin na musamman ne ga rukunin da ke cikin hadari: masu shigowa daga yankunan da cutar ke yaduwa, ma’aikatan lafiya da na jin kai, da kuma masu raunin garkuwar jiki da ke shirin tafiya zuwa wuraren da abin ya shafa. Haka kuma, ana iya ba da rigakafin gaggawa ga wadanda aka gano sun yi mu’amala da mai cutar, cikin kwanaki hudu zuwa goma sha hudu bayan haduwa.
Rigakafin kyauta ne ga wadannan rukunai, inda ake ba da allura ta farko sannan ta biyu bayan makonni hudu. ARS ta kara da cewa mutum da aka yi wa rigakafin sankarau (smallpox) tun yana yaro na bukatar allura guda daya kacal. Hukumar ta ce burin kamfen din shi ne kare masu hadari da kuma hana shigowa da yaduwar mpox a La Réunion.
Majiyar Labari: AA
