Gwarzon ɗan damben duniya Anthony Joshua ya tsira daga hatsarin mota, duk da cewa ya rasa abokansa biyu a haɗarin. An tabbatar da cewa an sallame shi daga asibiti bayan samun kulawa, inda likitoci suka ce yana iya komawa gida domin ci gaba da murmurewa. Hatsarin ya faru ne a Jihar Ogun yayin da Joshua da abokansa ke tafiya a cikin motar Lexus Jeep a hanyar Lagos–Ibadan, inda motar ta yi karo da wata babbar mota da aka ajiye a gefen titi.
Abokansa biyu, Lateef Ayodele da Cina Gami, sun rasu sakamakon haɗarin, yayin da Joshua ya samu raunuka amma ya tsira. Gwamnatin Ogun ta tabbatar da sallamarsa ta bakin wata sanarwa da ta wallafa a shafinta na X, tana mai cewa Joshua na cikin tashin hankali da alhini saboda asarar abokansa. Joshua tare da mahaifiyarsa sun ziyarci Lagos domin yi wa mamatan bankwana kafin a ci gaba da shirye-shiryen kai gawawwakin ƙasashen waje.
Gwamnatin Jihar Ogun da ta Legas sun miƙa ta’aziyyarsu ga iyalan mamatan, yayin da Shugaban Najeriya Bola Ahmed Tinubu ya nuna alhini tare da ƙarfafa Joshua bayan lamarin. Joshua dai ya kasance a Najeriya ne domin hutun ƙarshen shekara, kwanaki kaɗan bayan nasararsa a dambe kan Jake Paul a Miami.
