Masu ibada Kiristoci 166 da aka yi zaton ‘yan bindiga sun yi garkuwa da su a ƙauyen Kurmin Wali na Nijeriya sun fara komawa gida, bayan da aka gano cewa da dama daga cikinsu sun tsere ne a lokacin harin domin neman mafaka a wasu ƙauyuka.
Wani shugaban al’umma ya shaida wa AFP cewa har yanzu ana zargin mutum 86 na hannun masu garkuwa da mutane.
Harin da ya faru a ranar 18 ga Janairu, yayin ibadar ranar Lahadi a coci-coci uku, ya jawo hankalin duniya tare da ƙara matsin lamba kan gwamnatin Nijeriya.
Shugaban ƙauyen kuma babban limami, Ishaku Dan’azumi, ya ce mutane 177 aka yi zaton an sace su a farko, amma daga baya aka gano cewa wasu sun tsere ne suka fake a wasu ƙauyuka.
Wasu daga cikin waɗanda suka tsira sun bayyana yadda suka gudu cikin daji da gonaki na tsawon sa’o’i kafin su isa wuraren tsira. Wata uwa, Godiya Ayuba, ta ce ta dawo gida amma ta gano cewa ‘ya’yanta biyu suna cikin waɗanda ake zaton har yanzu suna hannun masu garkuwa, tana mai addu’ar dawowarsu lafiya.
A halin da ake ciki, hare-haren satar mutane na ci gaba a arewacin Nijeriya, inda ake fama da ‘yan bindiga, masu iƙirarin jihadi da kuma rikicin manoma da makiyaya. Bayan ikirarin Donald Trump game da kisan kiyashi kan Kiristoci, Amurka ta kai hare-hare kan ‘yan bindiga da ake zargin suna da alaƙa da Islamic State, amma hare-haren na ci gaba duk da matakan tsaro.
Majiyar Labari: TRT HAUSA
