Gwamnatin Jihar Kano ta ɗauki matakin gaggawa na dakatar da wasu likitoci da ake zargi da sakaci a aiki, lamarin da ya yi sanadin mutuwar Aishatu Umar, uwa ga ‘ya’ya biyar, bayan an yi mata tiyata a Cibiyar Kula da Masu Yoyon Fitsari ta Abubakar Imam da ke Kano.
Hukumar Kula da Asibitoci ta Jihar ta tabbatar da cewa binciken farko, wanda Sakataren Zartarwa Dakta Mansur Mudi Nagoda ya bayar da umarni, ya nuna cewa an manta almakashi na tiyata a cikin jikin marigayiyar bayan aikin tiyata. Wannan sakaci ne da aka ce ya janyo tabarbarewar lafiyarta har zuwa rasuwarta.
A cewar sanarwar da jami’ar hulɗa da jama’a ta Hukumar, Samira Suleiman, ma’aikata uku da ke da hannu kai-tsaye a lamarin an dakatar da su daga aiki nan take. Haka kuma, an miƙa batun ga Kwamitin Ɗa’a na Lafiya na Jihar Kano domin zurfafa bincike da ɗaukar matakan ladabtarwa bisa ƙa’ida.
Mijinta, Abubakar Muhammad, ya bayyana cewa matarsa ta riƙa fama da matsaloli masu tsanani bayan tiyatar, duk da yawan koke-koken da suka yi a asibiti, lamarin da ya ƙare da mutuwarta.
Lamarin ya tayar da hankalin al’umma a Kano da ma faɗin Najeriya, inda jama’a ke nuna fushi da damuwa kan sakaci da rashin ɗaukar alhaki a cibiyoyin kiwon lafiya na gwamnati, tare da kira da a yi adalci ga marigayiyar da kuma gyara tsarin kiwon lafiya gaba ɗaya.
