Jagoran addinin Iran, Ayatollah Ali Khamenei, ya wallafa wani sako a kafafen sada zumunta inda ya kwatanta Shugaban Amurka Donald Trump da Fir’auna, yana mai hasashen cewa zai gamu da kaddarar azzaluman tarihi.
A wani hoto da aka wallafa a shafinsa na X, an nuna Trump a matsayin gawar Fir’auna a cikin akwatin gawa mai rushewa, tare da rubutun “Kamar Fir’auna.” A sakon da ya rubuta da harshen Farisanci, Khamenei ya ce shugabanni masu girman kai kamar Fir’auna, Nimrod, Reza Khan da Mohammad Reza sun fadi ne a kololuwar ikonsu. “Wannan ma zai fadi,” in ji shi.
Wannan furuci na zuwa ne a daidai lokacin da Trump ke yin barazana ga shugabancin Iran, musamman dangane da zanga-zangar cikin gida da ke girgiza ƙasar.
Tun daga ƙarshen Disamba, Iran ke fama da zanga-zangar jama’a sakamakon tabarbarewar tattalin arziki da faduwar darajar kudin rial, lamarin da ya bazu zuwa manyan birane. Ƙungiyoyin kare haƙƙin bil’adama sun ce daruruwan mutane sun mutu, yayin da dubban aka kama, duk da cewa gwamnati ba ta fitar da ƙididdiga a hukumance ba.
Rahotanni sun kuma nuna cewa jami’an tsaro da dama sun rasa rayukansu yayin tarzomar, yayin da hukumomi ke ci gaba da ɗaukar matakan tsaro a faɗin ƙasar.
