Iran ta ayyana rundunar sojojin ruwan Birtaniya da rundunar sojin saman ƙasar a matsayin ƙungiyoyin ta’addanci, yayin da ta ayyana hukumar leƙen asirin ƙasar ta MI6 a matsayin “gungun maƙiya”, kamar yadda Ma’aikatar Harkokin Wajen Iran ta bayyana a ranar Lahadi.
A cikin wata sanarwa da kamfanin dillancin labarai na gwamnatin Iran, IRNA, ya wallafa, ma’aikatar ta ce matakin ya biyo bayan abin da ta kira ayyukan “ƙeta” da Birtaniya ke yi, musamman matakin da London ta ɗauka na ayyana rundunar juyin juya halin Iran IRGC a matsayin ƙungiyar ta’addanci.
Ma’aikatar ta ce an ɗauki wannan mataki ne bisa wani ƙuduri na Majalisar Tsaron Ƙasa ta Ƙoli ta Iran, bayan da Birtaniya ta ayyana IRGC a matsayin ƙungiyar ta’addanci ƙarƙashin dokar State Threats Act 2026 a ranar 13 ga watan Yuli.
Haka kuma, Tehran ta zargi London da shiga cikin yaƙin da Amurka da Isra’ila suka ƙaddamar kan Iran, ta hanyar ba su damar amfani da sansanonin soji da wuraren ayyukan jigilar kayayyaki da dabaru da ke ƙarƙashin ikon Birtaniya.
Zaman ɗar-ɗar a Gabas ta Tsakiya na ƙara ƙaruwa tun bayan da Amurka da Isra’ila suka ƙaddamar da hare-hare kan Iran a ranar 28 ga watan Fabrairu, lamarin da ya jawo martanin soji daga Iran a sassa daban-daban na yankin.
Duk da ƙoƙarin diflomasiyya da aka yi daga baya, da kuma yarjejeniyar fahimtar juna da Washington da Tehran suka rattaba wa hannu a watan Yuni, zaman tankiyar bai lafa ba, musamman kan batutuwan tsaro da zirga-zirgar jiragen ruwa a Mashigar Ruwan Hormuz.
