Wata kotu a ƙasar China ta yanke wa Tan Ruisong, tsohon shugaban kamfanin jiragen sama na AVIC, hukuncin kisa tare da jinkirin aiwatarwa na shekaru biyu, a wani babban shari’ar cin hanci da rashawa. Wannan hukunci na nuna yadda gwamnati ke ƙara tsaurara matakan yaƙi da rashawa.
Kotun da ke lardin Liaoning ta same shi da laifuka da dama, ciki har da almundahana, karɓar cin hanci, amfani da bayanan sirri don cin riba, da kuma fitar da bayanan gwamnati. An bayyana cewa ya tara fiye da yuan miliyan 700 (fiye da dala miliyan 100) ta hanyoyin da ba su dace ba a tsawon aikinsa.
Rahotanni sun nuna cewa Tan ya yi amfani da mukaminsa wajen sauƙaƙa yarjejeniyoyin kasuwanci da kwangiloli, yana karɓar cin hanci a maimakon haka. Haka kuma, an same shi da raba bayanan sirri da kuma ƙarfafa harkokin kasuwar jari da ba bisa ƙa’ida ba. A farkon shekarar 2025, an kore shi daga jam’iyyar kwaminis saboda zargin amfani da matsayinsa a bangaren masana’antar tsaro don amfanin kansa.
Wannan shari’a na daga cikin babban shirin yaƙi da rashawa na shugaba Xi Jinping, wanda ya shafi manyan jami’an soja, shugabannin kamfanonin tsaro, da manyan ‘yan siyasa. Baya ga hukuncin kisa mai jinkiri, kotu ta kwace dukiyoyinsa gaba ɗaya tare da hana shi haƙƙin siyasa har abada.
