Firayim Ministan Pakistan, Shehbaz Sharif, ya bayyana cewa ƙasarsa a shirye take ta karɓi muhimman tattaunawa tsakanin Amurka da Iran domin nemo mafita ta dindindin ga rikicin da ke faruwa a Gabas ta Tsakiya. Ya jaddada cewa Pakistan na goyon bayan duk wani yunkuri na tattaunawa da zai kawo zaman lafiya da kwanciyar hankali a yankin.
Sharif ya ce idan Amurka da Iran suka amince, Pakistan za ta kasance a shirye don sauƙaƙa tattaunawar da za ta kai ga cikakkiyar sulhu. Wannan mataki ya zo ne bayan rahotanni da ke nuna cewa shugaban rundunar sojin Pakistan, Janar Asim Munir, ya tattauna da Shugaban Amurka Donald Trump kan rikicin, yayin da ake duba Pakistan a matsayin wurin da za a iya gudanar da taron manyan jami’ai daga bangarorin biyu.
A lokaci guda, ana sa ran wata tawaga daga Amurka za ta isa Pakistan domin tattaunawa kan yadda za a kawo ƙarshen rikicin, sai dai majiyoyi sun nuna cewa Iran ba ta shirya shiga tattaunawa ba a halin yanzu saboda rashin yarda tsakanin bangarorin. Ma’aikatar harkokin wajen Pakistan ta kuma jaddada muhimmancin bin hanyoyin diflomasiyya tare da kira ga kafofin watsa labarai da su guji hasashe maras tushe.
Rikicin ya samo asali ne daga hare-haren da Amurka da Isra’ila suka fara kai wa Iran tun daga ƙarshen watan Fabrairu, wanda Iran ta mayar da martani da hare-hare a yankin. Duk da cewa Donald Trump ya sanar da dakatar da wasu hare-hare na kwanaki biyar bayan tattaunawa da Tehran, hukumomin Iran sun musanta wannan bayani, duk da cewa sun amince da karɓar saƙonni daga ƙasashe abokai kan yiwuwar tattaunawa.
Majiyar Labari: AA
