An gudanar da taron Kwamitin Haɗin Gwiwar Tattalin Arziki da Kasuwanci na Türkiye da Faransa (JETCO) a Istanbul, inda Ministan Kasuwanci na Türkiye Ömer Bolat da Mataimakin Ministan Kasuwancin Waje na Faransa Nicolas Forissier suka jagoranci tattaunawa. Taron ya mayar da hankali kan tsara sabuwar hanya domin ƙarfafa alaƙar tattalin arziki da kasuwanci tsakanin kasashen biyu.
Ömer Bolat ya bayyana cewa cinikayya tsakanin Türkiye da Faransa ta nuna gagarumin ci gaba, inda ta tashi daga dala biliyan 14 shekaru biyar da suka wuce zuwa dala biliyan 24.1 a 2025. Haka kuma, jarin juna ya karu, tare da kamfanonin Faransa masu yawa da ke zuba jari a bangarori kamar masana’antu, makamashi, sufuri da jiragen sama.
Bangarorin biyu sun tattauna hanyoyin faɗaɗa haɗin gwiwa a fannoni daban-daban, ciki har da makamashi, muhalli, jiragen sama, masana’antar tsaro da dabarun jigilar kaya. An kuma jaddada muhimmancin haɗin gwiwa a sassan mota, magunguna, makamashi mai sabuntawa, fasahar sadarwa, yawon buɗe ido da kuɗi.
Ministan ya kuma ce an tattauna dangantakar Türkiye da Tarayyar Turai, tare da nuna gamsuwa kan matakan da aka ɗauka game da batutuwan kwastam. A bangaren visa, Faransa ta bayar da biza 163,000 ga ‘yan Türkiye a bara, tare da rage lokacin jira da sassauta ƙa’idoji ga ɗalibai da ‘yan kasuwa.
Majiyar Labari: AA
