Ma’aikatar tsaron Türkiye ta sanar da cewa za a girke sabon tsarin kariyar iska na Patriot da NATO ta turo a lardin Adana, inda zai yi aiki tare da tsarin da Spain ta riga ta kafa a yankin. Wannan mataki na daga cikin kokarin kara karfafa tsaron sararin samaniyar kasar.
Jawabin ya fito ne daga bakin kakakin ma’aikatar tsaro, Rear Admiral Zeki Akturk, yayin wani taron manema labarai a sansanin jiragen sama na Incirlik da ke Adana. Ya bayyana cewa wannan sabon tsarin ya fito ne daga rundunar Allied Air Command ta NATO da ke Jamus.
Akturk ya jaddada cewa wannan kari na Patriot ba wai kawai wani mataki ne na hadin gwiwa ba, har ila yau yana karawa matakan tsaro na cikin gida da Türkiye ke dauka domin kare sararin samaniyarta da kuma lafiyar al’ummarta.
Shigar da wannan tsarin na zuwa ne a lokacin da ake fuskantar karin kalubalen tsaro a yankin, wanda ya sa ake kara hada kai tsakanin Türkiye da NATO wajen tabbatar da zaman lafiya.
