Bunge la Algeria limeanza kujadili muswada wa sheria unaopendekeza kuutambua na kuuharamisha kisheria utawala wa kikoloni wa Ufaransa uliokuwepo nchini humo kati ya mwaka 1830 na 1962, kwa kuutaja kama uhalifu wa kihistoria.
Kwa mujibu wa taarifa ya Bunge la Kitaifa la Watu, Spika wa Bunge Ibrahim Boughali aliwasilisha rasmi muswada huo wakati wa kikao cha jumla cha bunge la chini. Akizungumza mbele ya wabunge, Boughali alisema kuwasilishwa kwa muswada huo ni heshima kubwa na ni hatua muhimu kwa Algeria ya sasa katika kulinda kumbukumbu ya kitaifa na haki za kihistoria za wananchi wake.
Alisisitiza kuwa mjadala huo haukuwa wa kawaida, bali ni msimamo wa wazi wa kimaadili na kisiasa unaoonesha dhamira ya Algeria katika kutetea haki zake na kuheshimu sadaka za waliopigania uhuru wa nchi hiyo. Alieleza kuwa utawala wa kikoloni wa Ufaransa ulikuwa mradi wa kimfumo uliolenga kunyang’anya ardhi, kufuta utambulisho wa wananchi wa Algeria na kukatiza mizizi yao ya kihistoria na kitamaduni.
Boughali aliongeza kuwa ukoloni haukuishia katika uporaji wa mali pekee, bali ulihusisha sera za makusudi za umasikini, njaa na kutengwa kwa lengo la kudhoofisha jamii ya Algeria na kuvunja mshikamano wake.
Kwa mujibu wa taarifa ya bunge, muswada huo unatarajiwa kupigiwa kura Jumatano ijayo, sambamba na miswada mingine ya kisheria.
Mjadala huu unafanyika katika kipindi ambacho uhusiano wa Algeria na Ufaransa umeingia katika mvutano mkubwa. Hali hiyo ilichochewa zaidi baada ya Ufaransa kuunga mkono mpango wa Morocco wa kutoa mamlaka ya ndani kwa Sahara Magharibi, hatua inayopingwa vikali na Algeria, ambayo inaendelea kuunga mkono Front ya Polisario.
CHANZO: TRT Afrika
