A gaskiya yau ne hankalin masoya kwallon ƙafa ke kan Maroko, domin gasar AFCON 2025 ta shiga muhimmin mataki, inda ake fara zagayen ƙarshe na wasannin rukuni don tantance ƙasashen da za su shiga matakin ‘yan 16. Wannan mataki ne da zai fayyace waye zai cigaba da gasar da kuma waye zai tsaya a nan.
Yau Litinin, 29 ga Disamba, aka fara wannan zagaye a Maroko. Ƙasashen da suka riga suka samu gurbi a zagayen gaba sun haɗa da Nijeriya, Masar da Aljeriya, bayan cin wasanninsu biyu na farko da suka ba su maki shida. Sauran ƙungiyoyi kuwa na fafutukar samun nasara, musamman Maroko mai masaukin baki.
Wasannin ƙarshe a kowane rukuni ne za su tabbatar da waɗanda za su wuce kai tsaye, da kuma wasu na uku da za a zaba bisa ga yadda suka yi.
Rukuni A: Maroko na kan gaba da maki 4, sai Mali da Zambia (2-2), Comoros maki 1.
Rukuni B: Masar maki 6 ta tsallaka, Afirka ta Kudu maki 3, Angola da Zimbabwe na da maki ɗaya.
Rukuni C: Nijeriya ta tsallaka da maki 6, yayin da Tunisia, Uganda da Tanzania ke fafutuka.
Rukuni D: Senegal da DR Congo na da maki 4 kowannensu, Benin (3), Botswana ba ta da maki.
Rukuni E: Aljeriya ta wuce gaba, Sudan da Burkina Faso na fafatawa domin tsira.
Rukuni F: Ivory Coast da Kamaru suna jan ragama, yayin da Gabon ke neman maki na farko.
Ana sa ran waɗannan wasanni za su ƙara ɗora zafi a gasar, tare da cusa sabon salo a jerin ƙungiyoyin da za su yi takara a zagayen ‘yan 16.
