Mamlaka ya Mawasiliano ya Uganda (UCC) imetangaza kuwa huduma za intaneti zitafungwa kuanzia Jumanne, saa mbili kabla ya uchaguzi mkuu ambapo Rais Yoweri Museveni atachuana na mpinzani wake Bobi Wine.
UCC imesema hatua hiyo inalenga kudhibiti kusambaa kwa taarifa potofu, udanganyifu wa uchaguzi na uchochezi wa vurugu unaoweza kuhatarisha imani ya wananchi na usalama wa taifa.
Awali, serikali ilikuwa imekanusha madai ya kufungwa kwa intaneti, ikieleza kupitia ukurasa wake wa X tarehe 5 Januari kwamba taarifa hizo zilikuwa za kupotosha na zenye lengo la kusababisha hofu.
Huduma muhimu za serikali zimetajwa kuwa hazitaathirika na marufuku hiyo, huku intaneti ikibaki imezimwa “hadi tangazo la kurejesha huduma litakapotolewa.”
CHANZO: TRT Afrika
