Babban Bankin Libya ya sanar da rage darajar kudin ƙasar, dinar, da kashi 14.7 cikin 100 a ranar Lahadi, inda ya daidaita farashin canjin zuwa dinar 6.3759 kan kowace dala ɗaya ta Amurka.
Wannan mataki na zuwa ne a karo na biyu cikin ƙasa da shekara guda, alamar matsin tattalin arziki da ƙasar ke fuskanta sakamakon sauyin farashin mai a kasuwannin duniya da kuma rashin tabbas a harkokin kuɗi.
Hukumar ta bayyana cewa raguwar kuɗaɗen shigar mai da hauhawar kashe-kashen gwamnati sun ƙara taɓarɓarewar yanayin tattalin arzikin ƙasar.
Libya ta sake rage darajar dinarta bayan ta yi hakan a watan Afrilu 2025, lokacin da aka fitar da farashin dala a kan dinar 5.5677. A wannan karon, an ɗora dalilin matakin ne kan faɗuwar kuɗaɗen mai, rashin kasafin kuɗin ƙasa, da ƙaruwa a kashe-kashen jama’a.
