Gwamnatin Girka da ta Isra’ila sun bayyana aniyarsu ta zurfafa dangantakar ƙasashen biyu, musamman a fannin tsaro da soji, inda Girka ta ce tana koyo daga ƙwarewar Isra’ila domin ƙarfafa masana’antar kera makamai da fasahohin tsaro.
Ministan tsaron Girka, Nikos Dendias, ya ce haɗin gwiwar yanzu ya haɗa da atisayen sojoji, bincike, kirkire-kirkire da sabbin fasahohin yaƙi, ciki har da amfani da jiragen yaƙi marasa matuki (drones) da na’urorin ruwa masu aiki da kansu. Ya ƙara da cewa Girka na son wucewa daga zama mai sayen makamai kawai zuwa zama ƙasa mai kera su tare da haɗin gwiwa.
Ministan tsaron Isra’ila, Israel Katz, ya bayyana cewa wannan haɗin gwiwa wata muhimmiyar alaka ce ta dabaru tsakanin ƙasashen biyu, yana mai jaddada aniyar Isra’ila ta ƙara zurfafa haɗin gwiwar soji da na yankin Bahar Rum.
Isra’ila dai ta zama babbar mai samar wa Girka makamai kamar makamai masu linzami, drones da na’urorin yaƙin lantarki, yayin da sojojin Isra’ila ke yawan yin atisaye a ƙasar Girka.
