Somalia imetoa shukrani kwa serikali na wananchi wa Uturuki kwa msaada wao thabiti katika ushirikiano wa kiusalama na mapambano dhidi ya ugaidi. Kauli hiyo imetolewa baada ya Waziri Mkuu Hamza Abdi Barre kukutana na ujumbe wa ngazi ya juu kutoka Uturuki mjini Mogadishu.
Hamza alieleza kuwa Uturuki ni mshirika wa kimkakati ambaye amechangia pakubwa katika kuimarisha usalama, umoja, mamlaka na uadilifu wa ardhi ya Somalia. Mazungumzo hayo yalihusu kuimarisha uhusiano wa pande mbili, ushirikiano wa kiusalama, kupambana na ugaidi na uthabiti wa eneo la Pembe ya Afrika.
Ujumbe huo uliongozwa na Ali Onaner, mkurugenzi wa Idara ya Afrika katika Wizara ya Mambo ya Nje ya Uturuki, akiandamana na balozi wa Uturuki nchini Somalia, Alper Aktas. Onaner alisisitiza dhamira ya Ankara kuendelea kusimama pamoja na Somalia na kuimarisha ushirikiano wa pande mbili.
Ziara hiyo imefanyika wakati ambapo Israel imetangaza kutambua Somaliland kama taifa huru, hatua iliyokosolewa vikali na mataifa ya eneo hilo. Somalia imerejea msimamo wake wa kulinda mamlaka, umoja wa kitaifa na uadilifu wa ardhi, ikikataa vikali hatua ya Israel.
CHANZO: TRT Afrika
