Mamlaka za jimbo la North West nchini Afrika Kusini zimesimamisha huduma za usafiri wa wanafunzi binafsi mjini Mahikeng baada ya kuanza kukamata magari yasiyo na vibali halali. Hatua hii imekuja kufuatia ajali mbaya iliyotokea Januari 19 katika Gauteng ambapo wanafunzi 14 walifariki baada ya basi dogo kugongana na lori.
Wiki iliyopita, zaidi ya magari 60 yalitaifishwa katika Gauteng kwa makosa mbalimbali, ikiwemo kukosa vibali na vyeti vya usalama barabarani. Madereva wawili walikamatwa kwa kosa la kubeba abiria kupita kiasi.
Wawakilishi wa waendeshaji magari binafsi wamesema msako huu unawaathiri kiuchumi na kuhatarisha mali zao. Ofentse Mokhuane, akizungumza kwa niaba ya waendeshaji, alisisitiza kuwa wanataka mazungumzo na serikali ya jimbo ili kupata suluhu bila mivutano.
Wakati huo huo, familia za wanafunzi waliopoteza maisha katika ajali ya Vanderbijlpark zimefanya ibada ya pamoja ya mazishi, huku viongozi wa kitaifa wakitoa wito kwa wazazi kuhakikisha usalama wa huduma za usafiri wa watoto wao. Waziri Sindisiwe Chikunga alionya waendeshaji magari dhidi ya kutanguliza faida badala ya usalama, akisema: “Hamubebi mizigo, mnabeba mustakabali.”
CHANZO: TRT Afrika
