Hasashen da aka dade ana yi cewa kasuwar magungunan rage kiba za ta kai darajar dala biliyan 150 a cikin shekaru masu zuwa na fuskantar sake dubawa, yayin da farashin magungunan GLP-1 na kamfanonin Novo Nordisk da Eli Lilly ke raguwa a Amurka.
Masu zuba jari da masu nazari sun ce sauyin farashi, shigowar sabbin magunguna da kuma yiwuwar magungunan kwaikwayo sun sa ake rage tsammanin girman kasuwar da kuma lokacin da za ta kai kololuwarta.
A baya, tsananin buƙata ga magungunan rage kiba irin su Wegovy da Zepbound ya sa aka yi hasashen kasuwar za ta kai dala biliyan 150 zuwa 200 nan da farkon shekarun 2030.
Amma yanzu, yawancin hasashe sun ragu da kusan kashi 30, inda ake ganin kasuwar za ta kai kimanin dala biliyan 100 zuwa 2030, yayin da wasu ke ganin adadin biliyan 150 zai iya kaiwa ne bayan 2035. Wasu cibiyoyi na kasuwa ma sun rage hasashensu zuwa kasa da dala biliyan 100.
Masu nazari sun danganta wannan sauyi da faduwar farashi mai tsanani, musamman bayan kamfanonin suka fara sayar da magungunan kai tsaye ga masu amfani da farashi mai rahusa sakamakon matsin lamba na siyasa a Amurka.
Duk da haka, wasu na ganin cewa shigowar magungunan rage kiba ta baki maimakon allura na iya ƙara yawan masu amfani, wanda zai iya taimakawa kasuwar ta ci gaba da girma.
Sai dai ra’ayoyi sun bambanta: wasu kamfanoni da masu zuba jari har yanzu suna da yakinin cewa kasuwar za ta kai adadi mai yawa, musamman idan ƙaruwa a yawan masu amfani ta rufe gibin da raguwar farashi ta haifar. Duk da haka, masana sun ce shekaru masu zuwa — musamman 2026 — za su kasance muhimmai wajen tantance ainihin makomar kasuwar.
Majiyar Labari: REUTERS
