’Yan adawa a majalisar dokokin Ghana sun ƙara matsa lamba ga Shugaba John Dramani Mahama da ya gaggauta naɗa cikakkun ministoci a Ma’aikatun Tsaro da Muhalli, bayan rasuwar tsoffin ministocin bangarorin biyu a hatsarin jirgin sama mai saukar ungulu a bara. Shugaban ’yan adawa, Alexander Afenyo-Markin, ya yi kiran ne a zaman majalisar ranar Talata, yana mai cewa tsawon watanni ba tare da cikakken shugabanci ba ya na iya kawo cikas ga aiki da alhaki.
Afenyo-Markin ya ce ƙasar na fuskantar yanayi mai wuya da manyan ma’aikatu biyu ke tafiya da shugabanci na wucin-gadi. Ya bukaci shugaban ƙasa da ya miƙa sunayen sabbin ministoci domin ɗaukar ragamar bangarorin, yana jaddada cewa Tsaro da Muhalli muhimman sassa ne da ke buƙatar cikakken jagoranci.
A halin yanzu, Ministan Kuɗi Cassiel Ato Forson na aiki a matsayin ministan tsaro na wucin-gadi, yayin da Ministan Ƙasa da Albarkatun Ƙasa Armah Kofi Buah ke rike da ma’aikatar muhalli a wucin-gadi. ’Yan adawa sun ce wannan tsari bai isa ba, suna cewa nauyin da ke kan Ministan Kuɗi ya riga ya yi yawa balle a ƙara masa Tsaro.
Kiran ya biyo bayan hatsarin jirgin sama na bara da ya kashe ministocin Tsaro da Muhalli da wasu biyar yayin wata tafiya ta aiki. Tun daga lokacin, ma’aikatun biyu na tafiya ne da shugabanci na wucin-gadi, lamarin da ’yan adawa ke cewa ba zai daɗe yana aiki ba. A watan Nuwamba 2025, AIB Ghana ta fitar da cikakken rahoton bincike kan hatsarin.
Majiyar Labari: JOY ONLINE
