Gwamnatin Jihar Katsina ta tabbatar da rasuwar DPO na ‘yan sanda mai kula da Karamar Hukumar Rimi, CSP Muhammad Sani Kabir, wanda aka kashe yayin wani samame da jami’an tsaro suka kai kan ‘yan bindiga da ake zargi da satar shanu.
Sanarwar Ma’aikatar Tsaro da Harkokin Cikin Gida ta ce an hallaka ‘yan bindiga uku a farmakin hadin gwiwa da jami’an tsaro da ‘yan sa-kai na yankin suka gudanar. An ce jami’an sun kai dauki ne bayan sahihan rahotanni daga shugabannin al’umma kan yunkurin satar shanu a yankin Magaji, Mazabar Maje-Gobir.
Rahotanni sun nuna cewa artabu ya dauki tsawon dare har zuwa asubahi, inda aka kwato mafi yawan dabbobin da aka sace. Sai dai a yayin musayar wuta, bindigar DPO din ta samu matsala, lamarin da ya bai wa jagoran ‘yan bindigar damar harbe shi.
Gwamnatin ta ce jami’an tsaro uku da suka jikkata na jinya, yayin da aka kai gawar jami’in zuwa Zariya domin jana’iza. An kuma jaddada godiya ga hadin gwiwar al’umma wajen taimaka wa jami’an tsaro.
Majiyar Labari: TRT HAUSA
