Bayan naɗin Olatunji Rilwan Disu a matsayin sabon Sufeto Janar na ’yan sandan Nijeriya, masana tsaro sun fara duba dimbin ƙalubalen da ke gabansa. Disu ya maye gurbin Kayode Egbetokun, wanda ya yi murabus, a daidai lokacin da ƙasar ke fuskantar matsalolin tsaro masu yawa.
Sabon shugaban rundunar, wanda ya daɗe a aikin ’yan sanda tun 1992, ya taɓa jagorantar sashen tattara bayanan sirri na rundunar. Sai dai manyan matsalolin da ake sa ran zai fuskanta sun haɗa da satar mutane, hare-haren ’yan bindiga, Boko Haram, ISWAP, Lakurawa da rikice-rikicen manoma da makiyaya. Rahotanni sun nuna cewa kashe-kashe sun ci gaba da ƙaruwa, musamman a arewacin ƙasar.
Masana sun jaddada muhimmancin inganta walwalar jami’an ’yan sanda, ciki har da albashi da kayan aiki na zamani. A cewarsu, hakan na iya rage zarge-zargen cin hanci da ƙarfafa aikin rundunar. Sun kuma ba da shawarar a ƙara mayar da hankali kan tattara bayanan sirri domin dakile barazanar tsaro kafin ta auku.
Haka kuma, ana ganin hanzarta ɗaukar sabbin jami’an ’yan sanda 50,000 — kamar yadda aka yi alkawari — na iya taimakawa wajen rage matsin da rundunar ke ciki da kuma ƙarfafa tsaro a faɗin ƙasar.
Majiyar Labari: TRT HAUSA
