Gwamnatin Amurka ta sanar da dakatar da biyan kudaden Medicaid sama da dala miliyan 250 ga jihar Minnesota. Mataimakin Shugaban Ƙasa JD Vance ya ce za a ci gaba da riƙe tallafin har sai jihar ta ƙarfafa matakan yaƙi da zamba da ake zargin na cutar da masu biyan haraji.
Fadar White House ta bayyana matakin a matsayin wani ɓangare na sabon shirin yaƙi da zamba. Sai dai mahukuntan Minnesota sun soki hukuncin, suna mai cewa babu hujjojin da ke danganta dakatarwar da wata badakalar da aka tabbatar.
Gwamnan Minnesota Tim Walz ya kira matakin na siyasa, yana zargin gwamnatin Trump da kai hari kan jihohin da ‘yan Democrat ke mulki. Ya gargadi cewa dakatar da tallafin na iya jawo illa ga dubban iyalai, tsoffin sojoji, masu nakasa da ma’aikatan gwamnati masu ƙaramin ƙarfi.
A Minnesota, shirye-shiryen Medicaid da MinnesotaCare na tallafa wa kusan mutum miliyan 1.3. A faɗin Amurka, Medicaid na ba da kariyar kiwon lafiya ga sama da mutum miliyan 70 masu ƙaramin ƙarfi.
Majiyar Labari: AA
