Gwamnatin Zimbabwe ta sanar da dakatar da fitar da lithium ɗanye da sauran ma’adinai da ba a sarrafa ba, bayan wasu kamfanonin hakar ma’adinai sun fara gaggawar fitar da su kafin wa’adin dokar da aka shirya aiwatarwa a 2027. Hukumomi sun ce matakin kamfanonin ya sabawa shirin gwamnati na bunkasa masana’antun sarrafa ma’adinai a cikin ƙasar.
Tun farko an bai wa kamfanoni lokaci har zuwa 2027 domin su gina cibiyoyin tace lithium a Zimbabwe. Amma gwamnati ta ce maimakon hakan, wasu sun mayar da hankali wajen hako ma’adinai da yawa domin fitar da su waje, har ma ana zargin wasu sun boye lithium a wata kasa makwabta.
Zimbabwe na daga cikin manyan masu samar da lithium a Afirka, kuma ma’adinin na da matukar muhimmanci wajen kera batir da makamashin zamani. Gwamnati ta ce sabuwar dokar na nufin tabbatar da cewa ƙasar ta fi cin gajiyar albarkatun ma’adinanta maimakon fitar da su ba tare da sarrafawa ba.
