Majalisar dokokin Somalia ta amince da sabon kundin tsarin mulki bayan watanni na muhawara, wanda zai kawo sauye-sauye ga tsarin siyasar ƙasar.
Kundin ya maye gurbin tsarin wucin gadi da ake amfani da shi tun 2012, kuma ya sanya wasu sharudda ga masu neman manyan mukaman gwamnati, ciki har da cewa dole su kasance ‘yan Somalia kawai ba tare da wata ƙasa ta biyu ba.
Sabon tsarin ya kuma tsawaita wa’adin shugaban ƙasa daga shekaru huɗu zuwa biyar tare da iyakance shi zuwa wa’adi biyu kacal. Bayan kammala wa’adinsa, shugaban ƙasa zai kasance memba na majalisar dattawa har tsawon rayuwarsa. Haka kuma an kafa sharadin cewa masu neman mukamin shugaban ƙasa ko firaminista dole su kasance aƙalla shekaru 40.
Bugu da ƙari, kundin ya tanadi cewa ‘yan majalisa da sanatoci za a fara zaɓensu kai tsaye ta hanyar kuri’ar jama’a maimakon tsarin wakilan kabilu da ake amfani da shi a baya.
Duk da haka, shugaban ƙasa zai ci gaba da fitowa ne ta zaɓen haɗin gwiwar majalisun dokoki biyu. Shugaban ƙasar Hassan Sheikh Mohamud na da kwanaki 30 domin sanya hannu kan dokar kafin ta fara aiki.
