Kasuwar man fetur ta duniya na ci gaba da fuskantar tashin farashi yayin da kowace gangar ɗanyen mai ta haura dala $101 a ranar Alhamis, duk da wani babban mataki da Hukumar Makamashi ta Duniya (IEA) ta ɗauka domin kwantar da hankulan kasuwanni.
Rahotanni sun nuna cewa ƙasashe 32 mambobin IEA sun amince su fitar da ganga miliyan 400 na mai daga ma’ajiyar su ta gaggawa. Wannan mataki shi ne mafi girma da aka taɓa ɗauka a tarihin hukumar domin rage tasirin rikicin Gabas ta Tsakiya a kasuwar mai.
Sai dai duk da wannan mataki, farashin ɗanyen mai na kasuwar Futures for Brent crude ya ci gaba da tashi a kasuwannin duniya. Farashin ya ƙaru da kusan kashi 20 cikin ɗari, yayin da fargabar katse jigilar mai ta Mashigin Hormuz ke ci gaba da damun kasuwanni.
A cewar bayanan kasuwa, ana sayar da gangar mai samfurin Brent a kusan dala $101 da misalin ƙarfe 02:00 na dare agogon GMT. Wannan ya nuna karin fiye da kashi 38 cikin ɗari idan aka kwatanta da farashin da ake samu kafin rikicin da Amurka da Isra’ila suka fara kai hare-hare kan Iran.
Shugaban hukumar IEA ya bayyana cewa fitar da ganga miliyan 400 daga ma’ajiyar mai ta musamman wani yunkuri ne na kwantar da hankulan kasuwannin duniya da kuma rage tasirin rikicin Gabas ta Tsakiya da ya jawo tashin farashin mai.
Masana kasuwar mai na ci gaba da lura da yadda al’amura za su kasance, musamman dangane da yiwuwar katse jigilar mai ta Mashigin Hormuz na tsawon lokaci.
