Jakadan Iran a Majalisar Dinkin Duniya da ke Geneva, Ali Bahreini, ya bayyana cewa a halin yanzu babu wani shiri na tattaunawa tsakanin Iran da Amurka, kwanaki kadan bayan hare-haren hadin gwiwa da Amurka da Isra’ila suka kai kan Iran. Ya ce kasarsa ba ta tuntubi Amurka kai tsaye ko ta hannun wani domin tattauna batun kwantar da hankali ko kuma komawa teburin tattaunawa kan shirin nukiliyar Tehran ba.
Bahreini ya shaida wa manema labarai cewa Iran na da shakku sosai kan amfanin tattaunawa a wannan lokaci. A cewarsa, “yaren da Amurka kawai ke fahimta shi ne na kare kai,” yana mai jaddada cewa yanzu ba lokaci ba ne da Iran za ta shiga wata tattaunawa.
Wannan na zuwa ne bayan da wakilan Iran da Amurka suka gana a Geneva a makon da ya gabata tare da shiga tsakani daga Oman, inda aka ce an samu wani ci gaba a tattaunawar. Sai dai bayan kwana biyu kacal Amurka da Isra’ila suka kaddamar da hare-haren sama kan Iran, lamarin da ya kara dagula halin da ake ciki a yankin.
Iran ta mayar da martani da harba makamai masu linzami da jirage marasa matuki kan Isra’ila da wasu kasashen Gulf, sannan ta kuma rufe mashigar teku ta Strait of Hormuz, wacce ke da muhimmanci wajen jigilar mai da iskar gas zuwa duniya. Rikicin ya kuma haifar da tashin hankali a kasuwannin duniya yayin da ake fargabar cewa zai iya kawo cikas ga samar da makamashi.
