Tsohon Firayim Ministan Faransa, Dominique de Villepin, ya soki yadda ake tafiyar da rikicin Gabas ta Tsakiya, yana cewa gazawar abin da ake gani yanzu ta bayyana tun daga farko. A cewarsa, an gina matakan da ake dauka ne a kan tunanin cewa ƙarfi kaɗai zai iya warware matsala, alhali kuwa babu wata cikakkiyar dabarar siyasa da za ta nuna hanyar fita.
Villepin ya ce wannan ba sabon abu ba ne, domin a ganinsa an shafe kusan shekaru 25 ana maimaita irin waɗannan kura-kurai a wurare daban-daban kamar Afghanistan, Iraq, Syria, Libya da yankin Sahel. Ya kuma soki kalaman Donald Trump game da Iran, yana cewa irin matakan diflomasiyya da ake magana a kai yanzu ya kamata an fara su tun da wuri, ba bayan rikici ya ƙara tsananta ba.
Wannan ra’ayi nasa ya zo ne a lokacin da Sakatare Janar na MDD, António Guterres, ya yi gargadin cewa yaƙin da ke gudana ya wuce kima kuma yana ƙara jawo wahala mai yawa ga fararen hula. MDD ta ce ya kamata a kawo ƙarshen yaƙin ba tare da ɓata lokaci ba, yayin da asarar rayuka da matsalar jin ƙai ke ci gaba da ƙaruwa.
