Elon Musk ya ƙara ƙarfafa matsayinsa a kamfanin SpaceX bayan ya sayi hannun jari na kusan dala biliyan 1.4 daga ma’aikata. Wannan mataki na zuwa ne a daidai lokacin da kamfanin ke shirin shiga kasuwar hannun jari (IPO), inda aka riga aka miƙa wasu takardu a asirce a Amurka.
Rahotanni sun nuna cewa SpaceX na iya kai darajar kusan dala tiriliyan 2, sakamakon saurin ci gabansa da kuma tasirinsa a bangaren fasahar sararin samaniya da na zamani. Don ci gaba da rike iko, ana shirin amfani da tsarin hannun jari na musamman wanda zai bai wa Musk damar ci gaba da samun rinjayen kuri’a.
Haka kuma, akwai yiwuwar Musk ya samu karin hannun jari har miliyan 60 bisa wani tsari na lada da ya danganci nasarar kamfanin a nan gaba. Wannan zai kara karfafa jagorancinsa yayin da masu zuba jari ke kara nuna sha’awa.
A bangaren kudade, kamfanin na ci gaba da samun karfi, inda aka kiyasta ya samu ribar kusan dala biliyan 8 a bara, tare da kudaden shiga tsakanin dala biliyan 15 zuwa 16, musamman daga harkar intanet ta tauraron dan adam. Tun bayan kafuwarsa a 2002, SpaceX ya hada fasahar sararin samaniya da na basirar wucin gadi, musamman bayan hadewarsa da xAI.
Majiyar Labari: AA
