Serikali ya Ghana imemwita balozi wa Afrika Kusini kufuatia tuhuma za matukio kadhaa ya chuki dhidi ya wageni (xenophobia) yaliyohusisha raia wake wanaoishi nchini humo. Hatua hiyo imechochewa na video zilizosambaa mitandaoni zikionyesha baadhi ya Waghana wakinyanyaswa na kuambiwa warejee nyumbani “wakairekebishe nchi yao”.
Waziri wa Mambo ya Nje wa Ghana, Samuel Okudzeto Ablakwa, alisema tukio moja lilitokea katika mkoa wa KwaZulu-Natal ambapo raia mmoja wa Ghana, aliyekuwa mkazi halali, alikabiliwa na vitisho na kuambiwa aondoke Afrika Kusini. Serikali ya Ghana imeonya kuhusu kuongezeka kwa hali ya mivutano na kuwataka raia wake kuwa waangalifu.
Katika mazungumzo na balozi wa muda wa Afrika Kusini, Ghana ilisisitiza umuhimu wa mshikamano wa Kiafrika na kulaani vitendo vya unyanyasaji dhidi ya wageni vinavyokiuka misingi ya utu na ushirikiano wa bara hilo.
CHANZO: TRT Afrika
