Ƙasar Oman na kira da a gaggauta amfani da hanyoyin diflomasiyya domin kare muhimman hanyoyin sufuri na ruwa bayan tashin hankali da ya biyo bayan hare-haren Amurka da Isra’ila kan Iran. Hankali ya karkata ne musamman kan Strait of Hormuz, wata mahadar ruwa mai matuƙar muhimmanci inda kaso mai yawa na man fetur da gas na duniya ke bi.
Ministan harkokin wajen Oman, Badr Albusaidi, ya bayyana cewa sun yi tattaunawa mai kyau da babban jami’in diflomasiyyar Iran, Abbas Araghchi. Ya jaddada cewa ƙasashen yankin na da alhakin tabbatar da hanyoyin ruwa sun kasance a buɗe kuma cikin tsaro.
Ya kuma nuna muhimmancin bangaren jin kai, inda ya bukaci a sako matukan jiragen ruwa da aka tsare, yana mai cewa dole ne a ƙara ƙoƙarin diflomasiyya domin samun mafita mai ɗorewa da kuma kauce wa ƙarin rikici.
A lokaci guda, ana ci gaba da yunƙurin diflomasiyya a ƙasashe da dama. Araghchi ya kai ziyara zuwa Muscat, Islamabad da Moscow domin tattaunawa kan farfaɗo da shawarwari tsakanin Iran da Amurka. Duk da cewa an taɓa samun tsagaita wuta na ɗan lokaci a farkon watan Afrilu, har yanzu bangarorin biyu na da sabani kan manyan batutuwa.
Daga cikin muhimman batutuwan da ke jawo saɓani akwai tsaro da iko kan Strait of Hormuz, takunkumin Amurka kan tashoshin jiragen ruwa na Iran, da kuma shirin nukiliyar Iran. Matakan Oman na nuna ƙoƙarin yankin na hana rikici ƙara tsananta da kuma kare kasuwancin duniya, domin duk wata tangarda a wannan mahada na iya jawo hauhawar farashin makamashi da rikicewar sarkar samar da kayayyaki.
MAJIYAR LABARI: AA
