Makamu wa Rais wa Marekani, JD Vance, ametoa onyo kali kwa wakosoaji wa Israel wanaopinga makubaliano ya amani kati ya Marekani na Iran, akiwatahadharisha wasimshtumu “mshirika wao pekee mwenye uwezo” aliyebaki duniani.
Akizungumza katika Ikulu ya White House siku ya Alhamisi, Vance aliwaambia baadhi ya mawaziri wa serikali ya Waziri Mkuu wa Israel, Benjamin Netanyahu, ambao wana misimamo mikali, kwamba wanatakiwa “kuzinduka na kutambua hali halisi,” huku mvutano kati ya Netanyahu na Rais Donald Trump ukiendelea.
“Donald J. Trump ndiye kiongozi pekee wa taifa duniani ambaye kwa sasa anaonesha uungwaji mkono kwa taifa la Israel, na kwa bahati hiyo ndiye pia kiongozi wa taifa lenye nguvu kubwa zaidi duniani,” alisema Vance.
“Kama ningekuwa mjumbe wa baraza la mawaziri la serikali ya Israel, nisingekuwa namshambulia mshirika wangu pekee mwenye nguvu duniani.”
Marekani na Israel zilianzisha kwa pamoja vita dhidi ya Iran tarehe 28 Februari, lakini Trump ameikosoa Israel kwa kuendelea na mashambulizi dhidi ya Lebanon ambayo yalitishia kuvuruga makubaliano yaliyofikiwa na Iran.
“Katika kipindi cha miezi mitatu iliyopita, theluthi mbili ya silaha za kujihami zilizolinda nchi yenu zimetengenezwa na wafanyakazi wa Marekani na kulipiwa na walipa kodi wa Marekani,” aliongeza Vance.
“Tatizo la Israel si Donald J. Trump. Na yeyote nchini Israel anayefikiri kwamba tatizo lake kubwa ni Rais wa Marekani anapaswa kuamka na kutambua hali halisi ya mambo.”
Katika mahojiano na gazeti la New York Times yaliyochapishwa Alhamisi, Vance aliwataja moja kwa moja Waziri wa Usalama wa Taifa wa Israel, Itamar Ben Gvir, na Waziri wa Fedha, Bezalel Smotrich, kuwa miongoni mwa walioukosoa mkataba huo.
“Jibu langu kwao lingekuwa: Pendekezo lenu hasa ni lipi? Ninyi ni nchi yenye watu milioni tisa tu. Huwezi kutatua kila tatizo la usalama wa taifa kwa kutumia nguvu za kijeshi pekee,” Vance alisema.
Trump ataka usitishaji kamili wa mapigano, ikiwemo Lebanon
Trump mwenyewe amekuwa akiikosoa Israel kwa kuongezeka kwa vifo vinavyotokana na operesheni zake za kijeshi, hasa nchini Lebanon.
“Droni mbili zikidunguliwa jangwani na kuanguka bila kusababisha madhara, si lazima mujibu mkabomoe majengo huko Beirut. Wangeweza kujizuia zaidi na kufanya kazi bora zaidi,” alisema Trump katika mkutano wa waandishi wa habari wakati wa mkutano wa G7 nchini Ufaransa siku ya Jumatano.
Siku ya Alhamisi, Trump alizihimiza Israel na nchi nyingine za Mashariki ya Kati kuheshimu makubaliano ya kusitisha mapigano.
“Tunatarajia kuwepo kwa usitishaji kamili wa mapigano katika maeneo yote, ikiwemo Lebanon, Hezbollah na Israel. Asanteni kwa kuzingatia suala hili,” aliandika Trump kupitia mtandao wake wa Truth Social.
Israel imesema haitazingatia makubaliano ya amani kati ya Marekani na Iran.
Siku ya Alhamisi, mashambulizi ya Israel yaliwaua watu watatu nchini Lebanon.
Shirika rasmi la habari la Lebanon (NNA) liliripoti kwamba “ndege isiyo na rubani ya adui ililenga gari” katika eneo la Kfar Tibnit na kuwaua watu wawili.
Katika kijiji jirani cha Zebdine, droni nyingine ilimuua mtu mmoja zaidi, kwa mujibu wa NNA.
Jeshi la Israel nalo lilitangaza kuuawa kwa mwanajeshi mmoja usiku uliotangulia katika tukio kusini mwa Lebanon ambalo pia liliwaacha wanajeshi saba wengine wakiwa wamejeruhiwa.
Msemaji wa Katibu Mkuu wa Umoja wa Mataifa, Stéphane Dujarric, alisema walinda amani wa Umoja wa Mataifa nchini Lebanon pia waliripoti mapigano na kurushiana makombora siku ya Alhamisi.
