Hukumar Yaƙi da Cututtuka Masu Yaɗuwa ta Nijeriya (NCDC) ta tabbatar da cewa babu cutar Ebola a jikin mutane biyu da ake zargi da kamuwa da cutar a Yola da ke Jihar Adamawa, bayan gudanar da gwaje-gwajen lafiya sau biyu.
Hukumar ta ce tana aiki tare da gwamnatin Jihar Adamawa domin gudanar da bincike kan waɗannan mutane, inda aka killace su tare da ɗaukar samfurin jininsu domin gwaji. Sai dai sakamakon gwaje-gwajen biyu ya nuna cewa ba su ɗauke da kwayar cutar Ebola.
NCDC ta fayyace cewa mutumin da aka fara tabbatar da yana ɗauke da cutar a baya a Babban Birnin Tarayya Abuja, shi ne kaɗai wanda aka tabbatar ya kamu da Ebola a Nijeriya zuwa yanzu.
Hukumar ta buƙaci al’umma da su kwantar da hankulansu tare da samun bayanai daga hukumomin gwamnati da na kula da lafiyar jama’a da aka amince da su, domin kauce wa yaɗa bayanan da ba su da tushe.
Haka kuma, hukumar ta shawarci duk wanda yake fama da alamomin cutar da suka haɗa da zazzaɓi, matsananciyar kasala, ciwon kai, ciwon jiki, amai, gudawa ko zubar jini ba tare da wani dalili bayyananne ba, da ya garzaya asibiti domin samun kulawar likita, musamman idan akwai yiwuwar ya yi mu’amala da wanda ke ɗauke da cutar.
Ta kuma buƙaci masu fama da irin waɗannan alamomi da su sanar da ma’aikatan lafiya duk wani tarihin tafiya ko mu’amala da mutanen da ake zargi ko aka tabbatar suna ɗauke da cutar.
