Wani masoyin Manchester United ya dage ba zai aske kansa ba sai ƙungiyarsa ta yi nasara a wasanni biyar a jere. Yayin da shekarar 2025 ke ƙarewa, Frank Ilett ya cika kwanaki 452 ba tare da aski ba, tun bayan ɗaukar wannan alƙawari a Oktoban 2024 bayan naɗin Ruben Amorim a matsayin kocin United.
Frank Ilett, dan asalin Oxford mai shekaru 29, yanzu yana zama a Spain kuma yana da shahararriyar suna a soshiyal midiya karkashin laƙabin “The United Strand.” Ya ce idan United ta cimma nasara 5 a jere, zai aske kansa a Old Trafford tare da sadaukar da kuɗin agaji ga Little Princess Trust. Yanzu haka yana da mabiya fiye da miliyan 1.5 a dandalin sada zumunta, inda ke kara masa farin jini.
Sai dai ba kowa ya ji daɗin wannan alƙawarin nasa ba, domin a baya an hukunta wani magoyin bayan United bayan ya ja masa gashi a Old Trafford. Haka kuma tsoffin ’yan wasa irin su Nani sun bukaci tsohon tauraro David Beckham ya yi masa aski idan United ta yi nasarar jerin wasanni 5, yayin da Wes Brown ke yi masa wasa da cewa watakila ya ƙare da yin kitso irin na ‘yan Afirka.
Yanzu tambaya kawai ita ce: shin Manchester United za ta iya cimma wannan nasarar jerin wasanni 5 kafin Ilett ya ƙare da sabuwar salon gashi?
Majiyar Labari: TRT HAUSA
