Shugaba Donald Trump ya ce Amurka na fafatawa da Iran don kare ƙawayenta a Gabas ta Tsakiya da ƙasashen Yamma daga hare-haren da ka iya tasowa.
“Muna yin hakan ne don taimaka wa Gabas ta Tsakiya. Muna yin hakan ne don taimaka wa Isra’ila. Muna yin hakan ne don taimaka wa kanmu saboda bayan sun lalata Isra’ila, wanda suka yi farin ciki da yin hakan, sai kuma su juyo kan Gabas ta Tsakiya, sannan su biyo kan Turai da kuma wasu biranenmu,” in ji Trump a ranar Laraba.
Ya ce Amurka “tana aiki sosai kan Iran.”
Ya bayyana waɗannan kalaman ne a daidai lokacin da wani sabon tashin hankali da ya kawo ƙarshen zaman ɗar-ɗar na tsawon wata guda da aka kwashe, ya ɓarke.
A ƙarshen makon jiya ne Amurka ta kai harin rokoki a Tsibirin Larak da ke Iran. Bayan nan kuma Tehran ta mayar da martani ta hanyar harba makamai masu linzami a Jordan da Haɗaɗɗiyar Daular Larabawa.
A ranar Alhamis, an ji ƙarar jiniya a Kuwait, inda rundunar tsaron sama ta ƙasar ke ta ƙoƙarin daƙile hare-haren makamai masu linzami da jiragen sama marasa matuka a wani “babban harin Iran,” a cewar Ma’aikatar Tsaron ƙasar ta shafinta na X.
Rikici ya daɗa ƙaruwa tun bayan da sojojin Amurka suka kai hari kan wuraren da Iran ke kai hari a wani tsibiri da ke Mashigar Hormuz a ƙarshen mako, inda suka ce Iran na shirin amfani da wuraren wajen dasa nakiyoyinta.
Iran ta mayar da martani ta hanyar harba makamai masu linzami a sansanonin Amurka da ke Jordan waɗanda aka daƙile su.
