Rahotanni sun nuna cewa Amurka ta yi amfani da kaso mai yawa na manyan makaman ta a cikin yakin baya-bayan nan da Iran, abin da ya jawo tambaya kan yadda za ta kasance a shirye idan wani babban rikici ya sake tasowa. A cikin makonni bakwai kacal, rundunar sojin Amurka ta kashe kusan rabin wasu muhimman makamai nata.
Daga cikin makaman da aka fi amfani da su akwai kusan kashi 45% na Precision Strike Missiles da kuma kusan rabin tsarin kariya na Patriot da THAAD. Haka kuma an yi amfani da makamai irin su Tomahawk da sauran makamai masu nisa da yawa fiye da yadda aka saba.
Duk da cewa Amurka na da isassun makamai don ci gaba da ayyuka na ɗan lokaci, masana sun gargadi cewa ajiyar makaman yanzu ta ragu sosai idan aka yi la’akari da yiwuwar fada da ƙasa mai ƙarfi kamar China. Sake cika wannan gibin ba zai zama da sauri ba, domin ana hasashen zai iya ɗaukar tsakanin shekaru uku zuwa biyar ko da an ƙara yawan samarwa.
Masu nazarin tsaro sun ce hakan na iya haifar da wani ɗan lokaci na rauni, musamman a yankin Pacific inda tashin hankali ke ƙaruwa. Duk da haka, jami’an tsaron Amurka sun jaddada cewa har yanzu suna da ƙarfin da zai ba su damar mayar da martani ga kowace barazana idan ta taso.
Majiyar Labari: AA
