Rahotanni sun nuna cewa United States ta yi asarar kayan soji masu darajar kusan dala biliyan biyu a cikin kwanaki hudu na rikicin da take yi da Iran. Rahoton da aka tattara daga bayanai da kamfanin dillancin labarai na Anadolu Agency ya nuna cewa daya daga cikin manyan asarar ita ce na’urar hango bayanai ta US AN/FPS-132 da ke sansanin Al Udeid Air Base, wadda darajarta ta kai kusan dala biliyan 1.1 bayan makami mai linzami daga Iran ya lalata ta.
Haka kuma Amurka ta rasa jiragen yaki uku samfurin F-15E Strike Eagle bayan wani lamari da makaman kariyar sararin samaniya suka kakkaɓo su, lamarin da ya haifar da asarar da ake kiyasta ta kai kusan dala miliyan 282. Bugu da kari, Iran ta kai hare-hare kan wasu kayayyakin sadarwa da wuraren sojin Amurka a yankin Gulf, ciki har da hedikwatar rundunar sojin ruwan Amurka ta biyar da ke Manama.
Rahotanni sun kuma nuna cewa an lalata wasu sassan tsarin kariyar makamai masu linzami na THAAD da ke United Arab Emirates, wanda darajarsa ta kai kusan dala miliyan 500. Gabaɗaya, Iran ta kai hare-hare kan wuraren sojin Amurka da dama a Gabas ta Tsakiya, lamarin da ya kara tsananta rikicin da ke gudana a yankin.
Majiyar Labari: TRT HAUSA
