A yayin aikin sabunta tsohon birni a tsakiyar yankin Anatolia na Turkiyya, masana tarihi sun yi babban gano abin mamaki bayan an tono ragowar wata makarantar Islamiyya da ake kyautata zaton ta kai kusan shekaru 900, abin da ya ƙara haskaka muhimmancin Kayseri a tarihin Musulunci da wayewar da ta gabata.
An gano makarantar ne kusa da kabarin Melik Mehmed Gazi a gefen Masallacin Kebir a Kayseri, yayin aiwatar da shirin sabunta Surici Camikebir. Magajin garin birnin, Memduh Buyukkilic, ya ce makarantar na daga cikin tsohon ginin addini (külliye) da aka gina a zamanin Masarautar Danishmend, kuma za a gudanar da tonon ƙasa da gyare-gyare tare da Ma’aikatar Al’adu da Yawon Buɗe Ido domin farfaɗo da wannan muhimmin abin tarihi.
