A ranar bikin Ranar Mata ta Duniya, Kungiyar Tarayyar Afirka (AU) ta bukaci kasashen da ba su riga sun amince da yarjejeniyar nahiyar kan kawo karshen cin zarafin mata da ‘yan mata ba da su dauki mataki cikin gaggawa. Shugaban Hukumar AU, Mahmoud Ali Youssouf, ya ce Afirka na da daya daga cikin tsare-tsaren doka mafi ci gaba a duniya wajen kare hakkin mata da ‘yan mata, yana mai cewa wannan yarjejeniya na da muhimmanci wajen kawo karshen cin zarafi da tabbatar da tsaron su.
Youssouf ya jaddada cewa cin zarafin mata ba wai batun dabi’a kawai ba ne, har ma yana da tasiri kai tsaye ga zaman lafiya, tsaro, lafiyar jama’a da ci gaban tattalin arziki. Ya kuma yaba da rawar da mata ke takawa a sassa daban-daban a fadin nahiyar, yana mai cewa jagorancinsu na da matukar muhimmanci wajen gina Afirka mai zaman lafiya, wadata da kuma hadin kai.
Sanarwar ta kuma nuna wasu muhimman bangarori na tabbatar da daidaito tsakanin maza da mata, ciki har da harkar ruwa da tsafta. Sau da yawa mata ne ke daukar nauyin debo ruwa a al’umma, lamarin da kan jefa su cikin hadarin lafiya. Amma idan mata sun shiga cikin gudanarwa da kula da albarkatun ruwa da muhalli, sakamakon kan fi zama adalci kuma mai dorewa.
