Real Madrid na fuskantar ƙalubale a bana, inda ta yi wasa uku a jere a La Liga ba tare da samun nasara ba, lamarin da ya sauke ta daga saman tebur zuwa matsayi na biyu bayan Barcelona. A farkon kakar, Madrid ta yi tashe da nasarori bakwai a jere, tana zura ƙwallaye 16 kuma ana zura mata huɗu kacal. Sai dai koma baya ya fara ne bayan shan kashi mai nauyi 5-2 hannun Atletico Madrid a makon ƙarshe na Satumba.
Bayan wannan, Real Madrid ta samu nasarori shida a jere ciki har da doke Barcelona a El Clasico, ta kuma ci wasa 13 cikin 14 a dukkan gasanni. Amma daga baya ta shiga wani yanayi na rashin daidaito—ta fara da rashin nasara 1-0 a hannun Liverpool a Champions League, sannan ta tashi 0-0 da Rayo Vallecano duk da dama-dama da ta samu.
Hutun wasannin kasa da kasa bai kawo wani canji mai kyau ba, domin ta sake ɓarar da maki a 2-2 da Elche, sannan ta karɓi ƙwallaye uku a nasarar da ta yi 4-3 a kan Olympiacos, duk da cewa Mbappe ne ya ci huɗu a wasan. A makon da ya gabata, Real ta sake takawa da Girona inda aka fara ci mata ƙwallo kafin Mbappe ya farke ta daga bugun fenariti. Yanzu tana shirin buga wasa da Athletic Bilbao a San Mamés, yayin da ake ta tambayar: me ya sa ta samu wannan tangarda?
Babban matsalar ita ce rashin daidaiton haɗin gwiwa tsakanin Jude Bellingham da Kylian Mbappé a gaba. Sau da yawa suna shiga gurbi ɗaya a fili, abin da ke rage ingancinsu a wasan ƙungiyar. Bellingham ya dawo daga jinya yana ƙoƙarin kama salon kakar, yayin da Mbappe ke ɗaukar nauyin zura ƙwallaye lokaci zuwa lokaci.
Lokacin da kowannensu yake kan ganiya, kamar yadda aka gani a El Clasico da wasan Valencia, Real Madrid na iya zama barazana ga kowa. Amma a wasu wasanni kamar na Elche da Girona, babu wanda ya haskaka sosai.
